Inhoud:

• Èngelkes (Annie Schreuder-Derks)
  
• ein zomerwunjerke
• alderkienjer
• nuujjaorsversjke (Toos Schoenmakers-Visschers
  

 

Èngelkes

Engelkes op bloate veutjes

Danse sjpelend in de sjnieë

Sjtruie blinkend zilvre sjterkes

Doezende misjiens waal mieë.

Vreuger, went ich oet sjoal koom

Zeukde ich ze langs de waëg

Ieër det ich den aan 't hoes woor

Woor mien hendje al weer laëg.

Noe gaon ich ouch döks nog wanjele

Killemaeters door de sjnieë

Ein dèngk kan ich neet begriepe

Ich vènj noats gein sjterkes mieë.

Annie Schreuders-Derks

EIN ZOMERWUNJERKE:

Ein bieësjke zoa groat

wie ein körrelke zandj

Zoot op ein eikeblaad

Sjus aan de randj.

’t Wiebelde kriebelde

flök op en aaf.

Ich dach bie mien eige:

“Medein vilt ´t aaf”.

’t Hóng ein paar maeter

hoag baove de gróndj.

Ich wól ‘m get zègke,

mer heel miene móndj.

‘t Deeg zoa van al

waat zoa’n bieësjke al deit.

Ich heel mien henj aope,

opvanges gereid.

’t Woor ein mirakel

waat det bieësjke neet koos.

’t Riskeerde te väöl

en of wet ’t zoa moos,

’t blaedje det waegde,

‘t bieësjke det veel.

Ich woor blie det ich dao woor,

mien henj aope heel.

’t Woor get verduzeld,

’t haw zich versjrik.

’t Sjtèlt neet väöl veur,

went zoa’n bieësjke zoa ligk.

Mer zónger det ich ‘t

nog wós van te veure,

zoog ich opèns

ein klein wónjer gebeure.

‘t Dreijde zich óm,

zat zich rech op de bein

en vawde twieë zilvere

vleugels oetrein.

‘t Zat zich èns aaf

en doe zónger pardón

vloog ‘t òmhoag

regelrech nao de zón.

wiebelhudsje,
sjagkelvutsje,
hakke-sjoon,
boodsjappe-doon.

***

eine hood van mam
eine jas van pap
en hakke-sjoon
daag meneertje,
daag mevrouwtje,
ich gaon boodsjappe doon.

goeie morge,
goeie middig,
kiek mich hie ins loupe,
wie ein echte dame
gaon ich mich
get lekkers koupe.

al geit mich de hood get zakke,
al sjlaon ich óm op mien hakke,
al höb ich plaosters oppe kneen,
ich moog d'r bès waal zeen!

en kiek
hie bön ich
mitte boodsjappe weer,
daag mevrouw!
daag meneer!

Nuujjaorsversjkes

zalig nuujjaor.
ein haenke oppe tore sjteit,
't kling-klang-klökske
twellef oere sjleit,
de oliebolle klaor?
zalig nuujjaor!

***

hoera! 't is nuujjaor!
hie sjtaon ich mit mien wensje klaor,
al bön ich nag mer klein van sjtök,
ich wunsj uch väöl, heel väöl gelök!

Toos Schoenmakers-Visschers

Miè gedichte:

sjneegedich