’t Wónjer van ’t laeve mit zien sjerneermomente! (24-03-2010)
Op woonsdig 24 mieërt óm 20.00 oer in Broen Café De Mert in Ech.
’t Väörig jaor woor de Theater- en zanggroep SAS mit zien programma róndj ’t thema: “Koempels, Koele en Kaole” ’n geweldig succes. Op aandringe van diverse leje waerdje den ouch al snel beslaote deze groep opnuuj in ’t programma väör dit jaor op te numme. Waem ’t väörig jaor det wervelendj en tegeliek väöl indrök makendj optraeje van hun haet misgeloupe, krig noe ’n nuuj kans. Volges Jos Prop, de leider vanne groep, is dit programma mit es titel: “’t Wónjer van ’t laeve” zelfs nog baeter. Det belaoftj dus get.
In dit leedjesprogramma kómme alle aspecte van ’t laeve, van gebaorte tót de doad ane orde mit tekse van Herman Veugelers G. Rapaille, Meindert Muller en Jos Prop zelf. De meziek kömtj väörnamelik van Italiaanse volksleedjes en deze zeen väör dit programma gearrengeerdj door de eige dirigent: Rob Hodzelmans.
Naeve de groep SAS zal op deze aovendj Colla Bemelmans te gas zeen. Hae woor belas mit de samestèlling van ’t ónlangs versjene 3e Platbook róndj de twieë belangriekste sjerneermomente in oos laeve: de gebaorte en de doad. Hae zal ènkele werke oet dae bunjel väördrage es passendje aanvölling op ’t programma van de groep SAS.