Ein en get óngerein
Sjtreepkes, aksente: neet mie dink, zal ich mae naokakele. Ich zit mich nag ummer te sjörge mit ’t door vazel journaliste bedach versjil tösse een en één. Me mót één sjpelle wen me neet ‘n (un) kan zègke, zaet me. Tèlwäörd tèlle neet mie. Ich laes ummer euver polletiekers: ze zaten niet op een lijn. Gewies (Kirchroa: jewis) dink ich dan: ze zote op häöre zaetel. Tuurlik mót hiej één sjtaon, den ’t geit zich um EIN lien, sjtandjpuntj, meining. Binne ein vereiniging kónne maekelik twie of drei, veer liene zien. Ich sjrief: op één lijn, al moog det neet waege ei regelke det in de kaffee taengeneuver de Sjool veur de Journalistiek in Utrech oet ei glaas beer geklómme is.
Dit woor ei veurwaord veur waat mich vanmörge opveel. Ich zag: “veer mótte trök nao ein verleje”, en heurde det ich det ein get helder oetsjprook. Ich meinde: trök nao einen tied det veer nag väöl mie EIN wore. Mesjiens wore veer ’t doe mit mier dinger ins es noe, nao al die jaore.
Waat noe: versjil tösse ins en eins? Woveur neet? Eins = eenmaal: Eins es ich in de VUT zit, dan waert ‘t laeve eins zoe duur. En ins is dan: dezelfde meining höbbe.
Bön ich noe neet bezig veur te sjrieve waat ich angere verwiet?
Nae: dit zien suggesties, gein veursjrifte veur de sjpelling.
Get angers. Veur dichters is ’t dök deenstig det ze twie geliek gesjpelde wäörd höbbe, mit waal versjillende beteikenis. Kan me mit sjpele. Veur wäördjes wie ein guljt det neet, vinj ich. Gaer taengewäörd.
Wäörd zien biej de leefhöbbers van Oos Taal meis zelfsjtenjige naamwäörd en wirkwäörd. Me sjtechelt zich euver de juuste sjpelling en beteikenis, of kermeliet det al weer ei geleef waord bao weg is. Ach: klump zuut me onneet väöl mie. Jaowaal: ze hange aan de moer, mit blome d’rin. Ouch sjiek.
Mae die klein wäördjes wie ’t sumpele ein, die ...
... mótte veer aje, knoevele, sere mit bleumpkes. Helaas: oos ein waert: mekaar, elkaar; wäörd wo geine ’t gehing (samenhang) van zuut. Waat is det ---aar van elkaar? Daoveur sjrief ich: ze heure biejein, haoje mitein (euver), en zien dus ein óngerein. En einen óngerein is: een huishouden van Jan Steen of een rommeltje. Went geer dao rummelke van wilt make, moog, al vinj ich det ei bietje verrómmele, wiewaal waal juus. Juus liek op jus = saus, en die krege veer neet allein biej aerpel, mae ouch wen get óngerein op taofel keem: stamppot. Dus: get óngerein is EIN waord, en zólle veer det daoveur aanein mótte sjrieve? Getóngerein, det sjnap geine. Mesjiens get-óngerein? Zuut neet oet. Waem hulp?
Wim Kuipers, Neel
november 2010