Gezinsmès in oos eige taal (11 juni 2011)
In Pej bestuitj de parochie en kirk dit jaor 150 jaor. Ein van de festiviteite is de dialekmès op zaoterdig 11 juni óm 19.00 oer, wo-aan weer es krink oos mitwèrking zólle gaeve en ouch in de väörbereijing al höbbe mitgedaon. ’t Zal ’n fieëstelike viering waere, wo in väörgeit Pestoar Mom en mit zang van ’t kènjerkoar ónger leijing van Inge Jöerissen. Thema vanne deenst is “Leech väör ederein”.
Veldeke Krink Ech haef hie aan gaer de mitwèrking gegaeve vanoet de doelstèlling óm ’t gebroek vanne eige streektaal op zoa väöl mäögelike en versjillendje terreine in standj te haoje en te bevordere. Ein H. Mès in ’t dialect spruktj minse meistal hieël direct aan, ómdet ós die taal zoa eige is.
Väör de leje van Veldeke Krink Ech kömtj dees dialectmès teves inne plaats vanne jaorlikse viering inne kersttied. Ze zeen den ouch van herte oetgenuuedigdj.
’t Bestuur zal ’t op pries stèlle es väöl leje d’r bie zeen. W’r make d’r ‘ne aovendj van, want nao aafloup vanne mès zeentj g’r welkom in de zaal “Pejjerhaof” aan de Houtstraot väör ’n lekker tas kóffie mit vlaai. Det is op loupaafstandj vanne kerk.