Groat succes väör Zöstere en Ech bie provinciale declamatiewedstried!
Oppe foto: lènks Johannie Dieks en daonaeve (mit patsj) Patty Kurvers, middeväör Maike Jetten en rechtsväör Mark Peters
Bie de Limburgse Finale van de declamatiewedstrieje van Veldeke, kort geleje gehaoje in Wieërt, zeen veer van de nege prieze behaoldj door kènjer oet de krink Ech.
De nummers 1 en 2 vanne wedstrieje die de krink organiseerdje in Zöstere en in Pej kóste mitdoon aan de provinciale kampioensjappe. Die wore dit jaor weer hieël spannendj en de concurrentie van de anger kringe woor groat. Toch lökdje ’t óm veer prieze weg te sleipe, wovan twieë provinciaal kampioene!
Dit woor ’t resultaat:
Groep 5/6: Mark Peters van BS “In ’t Park” in Zöstere wón de ieëste plaats en daomit ’t Limburgs Kampioensjap mit zien gedich äöver de nuuj sjoon die d’r haw oetgezóch, mer die get aan d’n krappe kantj wore en ouch neet alledaags van kluuer. Hae deej ’t daoróm “oppe sökke”.
Groep 7/8: Johannie Dieks, ouch van BS “In ’t Park” in Zöstere haw ’n väördrach äöver ’t ómgaon mit ‘n gehuuerapparaat en brach det dusdanig det de jury de ieëste plaats toekèndje en dus ouch ’t Limburgs Kampioensjap in die categorie. Ouch in de categorie groep 7/8 haoldje Patty Kurvers van OBS “de Driepas”in Ech de twieëde plaats en woor dus good väör zilver, mit zien zelfgemaakdje gedich “Twieë geite”.
Groep 3/4: de twieëde plaats väör Maike Jetten van BS “Patricius” oet Pej mit ’t gedich “Keusjes” en det se die mer baeter waal kèns aete. Det woor dus ouch de zilvere troffee.
Alles bie-ein ein prima resultaat! De Krink Ech wènsjt hun nog èns hertelik perficiat en bedanktj alle kènjer die mitgedaon höbbe (en hun aojers/verzörgers) väör de meujte en ’t plezeer womit ze höbbe deilgenómme. Tót ’t vólgendj jaor!?