Kersfieës väör leje / Kerskaarte sjrieve en versture…
Kersfieës väör leje
Op vriedig 16 december a.s. is de traditionele kersviering väör de leje van oze krink. Hieväör haet m’n zich kènne insjrieve. Det is nuuedig in verbandj mit de väörbereijing van ’t diner. Es g’r det gedaon höbtj, waertj g’r óm 19.00 oer verwach in Broen Café de Mert. Naeve ’n drenkske väöraaf, ’t kersdiner en aansloetendj ’n tas kóffie, weurtj de aovendj verder ingevöldj mit meziek, väördracht en – neet te vergaete – oos laoterie mit prachtige prieze. Det belaoftj weer ‘ne sjoane en gezellige aovendj te waere.
De kersmeziek kömtj deze kieër van René Haustermans. Hae zörgtj väör get meziek oppe achtergróndj ónger ’t aete, mer ouch väör kersleedjes tössedoor.
René is al zien laeve lank mit meziek begaon: bezig zeen mit meziek en studie make van meziek. ‘Ne tied lank woor hae bie de groep Kartoesj. Hae is noe dirigent van ’n paar koare en richtj zich mieë op ’t brènge van loesterleedjes. Hae haet zich ónger angere verdeeptj in de historie van de Limburgse kersleedjes. Dao-äöver zal hae ein en anger vertèlle en natuurlik ouch ’n aantal leedjes laote huuere.
Kerskaarte sjrieve en versture…
Väör väöl minse is ein activiteit in deze tied van ’t jaor ’t sjikke van kers- of nujaorskaarte aan femielie, vrunj, bekèndje of zake-relaties. Ouch det is ’n sjoan stökske traditie, wo noe en den –terech – ouch vraogteikes bie gezatj kènne waere. Mit name de vraog in hoeverre de commercie hie de zaak in henj haef en de oorspronkelike gedachte en beteikenis weurtj verdrónge.
Mesjien es gevolg hievan gaon minse regelmaotig äöver op ’t zelf make van kaarte en wènse. Daobie weurtj dök gekaoze väör ‘ne teks in oos eigen taal of dialekt. Op kaarte (en vreuger in breve!) en persuuenlik op kersdaag en nujaorsdaag wènse de luuj zich óngerein “zalig kersmis” en alle goods väör ’t nuuj jaor. In de kersnach of nao de nachmès geuf m’n zich ’n handj en spruk m’n de wens persuuenlik oet. Via de telefoon geit natuurlik ouch.
Waem ’t mit ’n kaart of per e-pos wiltj of geitj doon, wille w’r daobie van deens zeen, zoadet g’r de teks van eur wèns den ouch good höbtj gespeldj:
In ’t Echs: “W’r wènse uch ‘ne Zalige Kersmis en ’n Gelökkig Nujaor”
Of:”Sjoan kersdaag en ’n good nuuj jaor”
In Zöstere: “Prettige kersdaag en ’n Zalig Nujaor”
Oppe Boesj: “W’r wunsje uch ‘ne Zieëlige Kersmis en ’n Gelökkig Nujaor”
Of: “Sjoan kersdaag en ’n good nuuj jaor”
