Nao ‘t Museum van de Vrouw (17-11-2010)

Op woonsdig 17 november bezeuke w’r mit de Krink ’t Museum van de Vrouw in Ech. Dao is den ’n tentoanstèlling mit es titel: “Huisvrouw….zonder beroep?” G’r snaptj al wo det óm drejt: hoesvrouw zeen is det den niks? ’N äöverzich van de hieël collectie van ’t museum weurtj gebroektj óm aan te tuuene det dit waal ’n misverstandj mót zeen. De vrouw es “manager”van ’t hoeshaoje stuitj centraal, of det noe de (me)vrouw zelf is of de deensmaag. Die plaatse zeen in de loup van de väörige ieëw ouch nog èns totaal verangerdj. Al mit al genóg om ’n expositie róndjóm same te stèlle. En w’r kriege dao oetlèk bie van Annie Schreuders-Derks.

 

De aovendj geit d’r es volgtj oet zeen:

W’r beginne deze kieër  óm 19.30 in de “Gooj kamer” van ’t museum mit kóffie en flaaj (väör eige raekening!).  Aansloetendj de laezing van Annie en daonao bezeuk aan de tentoanstèlling; de koste hievan dreugtj de Krink.( Introducees betale vief euro hieväör.)

  

Hadj g’r ‘ne angere titel inne kop väör dees laezing? Det kloptj. Op oos programma stóng tót noe: “Van Sinte Maerte tót Driekäöninge”, mer det is verangerdj.

 

Lètj dus op: half ach beginne, op woonsdig 17 november, Museum aan de Plats 1 in Ech.