Prissentatie gedichtebundels Tegele en Venlo
Vuul Venlose en Tegelse minse hebbe in eur jónge jaore meigedaon aan de declamatiewedstrieje van Veldeke-Krink-Venlo en aeve zoeëvuul minse zulle zich zeker nog de ièrste regels van eur gedichje kinne herinnere.
Nao de finale aovend van de declamatiewedstrieje in Tegele en Venlo krege de minse van Veldeke dan ouk dökker de vraog of de gedichjes oeits ens oètgegaeve zoele waere.
Aan die vraoge hebbe weej gaer wille voldoon. Eine werkgroep in Tegele en eine in Venlo is aan de slaag gegaon um ‘n selectie te make oèt ’t aanbod van jaore en jaore gedichjes: 11 jaor in Tegele en 38 jaor in Venlo. Weej hebbe de schrièvers en schrièfsters um toestumming gevraog um de gekaoze gedichjes te meuge publicere en emes gezóch dae d’n bundel netjes vorm kós gaeve.
De bukskes zien noow gereid: veur Tegele d’n bundel “Dôw dichs mich get!” en veur Venlo: “Dich dichs mich wat”.
Dees bukskes waere op 6 oktoeëber 2010 smiddaags um 14.00 oor geprissenteert in de bibliotheek aan de Begienegank in Venlo.
De ièrste Tegelse bundel geit nao d’n hier Frank Giesen en d’n ièrste Venlose bundel krièg Hanneke Steinman, de winnares van de Giel Aerts-trofee 2010.
De gedichtebundels (Tegels en Venloos) zien te koup beej:
Koops Bookhandel aan de Klaosstraot 17 in Venlo
Wilbro Bookhandel aan de Kerkstraot 35 Tegelen en Jeustraot 10 in Venlo
Bookhandel Jos van Heel aan de Grotestraot 64 in Tegele
't VVV-Kentoeër Venlo, Niestraot 40-42 in Venlo
't Limburgs Museum, Kölsepaort in Venlo
De werkgroepe in Tegele en Venlo hebbe eur uterste bes gedaon um d’r moeie en laezeswaerdige bundels van te make, weej haope dan ouk det geej d’r vuul plezeer aan zult belaeve.
(noot: Een Nederlandse versie is ook te lezen onder de rubriek Agenda).