Tradities róndj de Echter Kirmes (29-09-2010)
In de loup van de lange tied det de Echter Kirmes al bestuitj, höbbe zich väöl gebroeke en tradities gevórmdj. M’n zaet waal det de kirmes in Ech nog ’n echte femilie-kirmes is. In elk geval weurtj ze duchtig gevierdj. Dao weurtj door de Gemèndje en de kirmesexploitante ouch vanalles väör gedaon, óm die traditie in standj te haoje en de luuj van Ech en ómstreke te laote oetkieke nao dit jaorliks gebeure.
Waat behuuerdje vreuger zoa-al tót die tradities? 'n Nuuj klèdje of pekske, zóndigse soep en genóg vlaai nao de bekker, nae spies väör de vlaai, want die verzörgdje m’n zelf. En oppe mert : de sjómmele, de zjimmie en de steile wandj mit rónkendje motore es presentasie d’rväör, mer ouch neet vergaete de vèsboer en slókkraom.
Waat is verangerdj en wie is ’t noe?
Weer höbbe ’t lid van oze krink en teves lid vanne kèrmiscommissie vanne Gemèndje, Peter Roufs bereid gevónje ós op deze aovendj ein en anger te vertèlle en te laote zeen van de geweldige hoeveelheid materiaal die d’r in de loup vanne jaore äöver de kirmes haet verzameldj. Väörig jaor nog haef d’r hie-äöver ’n presentatie verzörgdj op ’n internationaal congres in Amsterdam väör pastores oet de kirmes- en circuswaereld. Noe duit hae det väör oze krink en väör de belangstèllendje leje van oos zöstervereniginge de Heemkundekring “Echter Landj” en de Natuurhistorische Vereniging “Pepijnsland”, die ouch welkóm zeen op deze gezamelike aovendj.
Peter Roufs zal deze aovendj ouch ein en anger vertèlle äöver ’t kirmesorgel, det – väöral vreuger – de sfeermaker op kirmesse woor en ouch in de cafees.
De aovendj höbbe w’r daorom geméndj te motte laote muzikaal ómlieste door Joop Kormelink mit ziene zelfgeboewdje miniorgel.