Vastenaovend en Paose…

Waorum weej zeve waeke nao de vastenaovend  Paose viere, is beej vuuël minse neet mièr bekind. Waat de meiste waal weite is det haos ederein op Paosmaondaag  vreej is. Waorum ik ‘haos’ d’rbeej heb geschrève, kump umdet vuuël winkels eur deure op dae twieëde Paosdaag, aope doon. Veur de schoèlgaonde jeug is Paose nog wiechtiger, zeej hebbe dan Paosvakansie. Waorum Paose eder jaor op ‘ne andere datum velt is op ’t concilie van Nicaea in ’t jaor 325, beslaote.  De kerkleiders van toen, sproke aaf  det de ièrste zóndaag nao de ièrste volle maon, nao ’t begin van de lente, 21 maart, ’t Paosfees gevierd zoel waere. Zeve waeke daoveur is ‘t dan vastenaoveszóndaag. Fièrtig daag vaste en twieë daag good aete en drinke.  Umdet de minse op zóndaag zoeë wiezoeë vreej hadde woort dae zóndaag d’rouk maar aan vasgeknup. Taegeswäördig is de zaoterdaag d’rouk al beej. Weej kinne oètraekene, as det zoeë doorgeit, wannièr weej allein nog maar vastenaovend vière.   Noow weej weite waorum Paose eder jaor op ‘ne andere datum gevierd wuurt weite weej ouk waorum vastenaoveszóndaag eder jaor op ‘ne andere daag velt. Gelièrde luuj hebbe beraekend det ’t op zien vruugs op 1 fibberewarie- en op zien laatst 8 maart vastenenaovend kin zien. Koppele weej dao aan de Paosdaag dan kin ’t op zien vruugs op 22 maart- en op zien laatst op 25 april, Paose zien. Noow geej weer ’n bietje ziet beejgepraot en kint zegge det geej van wante wet, vraog ik mich aaf wie ’t kump det weej vuuël zake oèt ’t verleje met ’t grutste gemaak van de waereld van de hand doon. ‘ne Praos wao weej lekker in kinne wegdoèzele, maar dae heej en dao ’n verslete plekske haet, smiete weej weg asof ’t niks is. ‘ne Krant dae weej gelaeze hebbe en wao smeis doèzende letters en  getalle in staon, smiete weej beej ’t ald pepeer, d’rneet beej naodinkend met wievuuël gedöld die letters in dae krant gezatte zien. Hoewaal…..smeis dink ik of die letters waal met gedöld, maar neet met zörg in dae krant gezatte zien. Waat det allemaol met Paose van doon haet beste laezer, zal ik óch vertelle. Weej doon alles de deur oèt waat waal of neet verslete is, maar de vastenaovend en Paose, die same al mièr as zevetiënhónderd jaor ald zien, blieve weej halde. Hoewaal….waat neet verslete is en waat nog good werk, doon weej neet rap de deur oèt. Veur de vastenaovend hoof ik niks de deur oèt te doon, sterker nog ik mót d’r zelf veur de deur oèt. As iets ós Limburgers ós ganse laeve good bevalle is dan is ’t vastenaovend viere. En umdet dae vastenaovend neet weg hoof, doon weej ouk de Paose maar neet weg, dink ik!

Jan Maas
Venloos