Veldgewas is jaorig
Op Nationale Gedichtedaag 26 januari 2012 bestuit Veldgewas ein jaor. Mieër es hóngerd gedichter zeen d'r aafgeloupe jaor in de E-bös gevalle en hie trök te laeze. (Klik rechts in balk).
Kiektj hie-ónger nao de aankóndiging van verleje jaor. Gaatj 't uch...?: gaeftj 't e-mailadres den door, want ouch kómmendj jaor zulle ze weer wie losse blajer in de bös valle - oos gedichter.
Poëzie in ‘t Limburgs is de veurbiej jaore ummer belangrieker gewaore. ‘t Guf mier dichters in ‘t Limburgs dan Limburgers die in ‘t Nederlandjs dichte. Zoe heurt det zich. Allein: de aandach veur die dichters is te min. Ze moge zelje of noets mitdoon aan literair aovendje, waere gewaerd op sjole, mae aevegood davert en diejt waat gesjreve waert in Oos Taal.
Daoveur höbbe zich ei paar miense biejeingedaon en Veldgewas gezejd. ‘t Grei is wied baeter opgekómme es verwach.
Waat is det noe, det opgekómme Veldgewas? Noe nag eine Werkgroep, sjtrakkes ein Sjtichting. ‘t Ierste wirk zal al gans nuuj zien: jeder waek drei gedichter in ‘t Limburgs nao de leefhöbbers sjikke. Die kriege die gedichter gratis in de E-bös, dus op eur eige mailadres bezörg. Geer hoof nieks te doon es eur adres te sjikke nao: veldgewas@home.nl.
‘t Ierste gedich geit versjiene op de twelfde Gedichtendag, dónderdig 27 jannewarie 2011. Nómmer twie kump dan d’n daag d’rnao. Veurluipig versjiene drei gedichter in de waek: op maondig, goonsdig en vriedig. Saoterdigs ‘t Waord van de Waek van Wim Ku(i)pers, dae aafgeloupe augustus ‘t ierste Veldgewas gezejd haet.
Wo?
Boete. Dao vinjt hae ouch de wäörd veur ‘t Waord van de Waek. Verse wäörd, neet oet de vrezer. Aoj wäörd mesjiens, mae vergaete, den ze wore örges in ‘t greun versjaole, wie Frans Boermans veurzag. Is - vräögske - veur Veldgewas de Nederlandjse poëzie wie kamerplantje, opgetroch oet sjtekskes of gekoch? Waem wit.
Enne, waem gedichter in wilt sjikke: doon. Gedichter die mit d’n tied van ‘t jaor vandoon höbbe, wie wintjer, Vastelaovendj, vreugjaor, Paose, bleuj en blome make mesjiens get mier kans. Sjikke nao: veldgewas@home.nl.
Jaomer genóg kan dao nieks veur betaald waere. Waal kómme alle gedichter die Veldgewas sjik op dees site te sjtaon. Laot gaon jao gaon, de koempel en keplaon, de maerelink mit de sjpraon: ein sjaor van 11 x 14 sjaors. Mitdoon.