Vruntj van de dierplaagbeheerser
Foetballe en Tour gewaes, nag gein regiering, dus weer eine Letterbak. Poezel (haet nieks mit poezele = aaien vandoon) mit: Nederlandjs waord van 19 lètters, veur ei dink det meistes neet hulp.
Neet naodinke wiejer: gootsteenontstopper. Mich veel det op, det óndink, wie ich ’t Ingelse waord daoveur zoog: plumbers friend, de vruntj dus van de loodgeter. Sjiek waord, wiewaal de beteikenis neet dudelik is. Mót det dan? Is eine grensrechter eine rechter? Moog dae sjtraof gaeve? Ingels is: linesman, de vent langs de lien. Baeter (dink ich).
Allewiel zeen veer ’t umgedrejde. Ambteniere make wäörd die te dudelik zien, en de media numme die braaf euver. Plaatsdelict beveurbeeldj – bedink uch woveur det verkierd is. Eine sjtäönde haoje = arrestere. Ich laes det de rattevenger noe eine dierplaagbeheerser is. Dae zörg det d’r net genóg muus, kaevers en mögke moge zien, zoedet de kezers neet hove knotere – meint de polletiek. In ’t Heuvellandj zoog ich op plaatse piketpäölkes (wie die van M. Rutte) sjtaon, mae dan houtere. Mós begriepe det de boere dao ei sjtök landj aafgaeve, of oetlene, wo nieks mie mit gebäört. Dan kónne – zaet ei sjiltje – dao nuuj plante kómme. En wie dan? Zjuus: “vanuit de zaadvoorraad”, laes ich. Moog ich det neet dudelik vinje?
Knotere? Nae: ich haop det veer oos wäörd neet langer verkierd gaon vinje wiel ze die in Hollandj neet kinne. Gootsteen woor pómpesjtein. Kónne veer blieve gebroeke, ouch al haet geine mie ein pómp (binne in hoes). Aanrèk is ouch good, mae neet rech – vinj ich (terech?).
Hiejbaove sjteit (wen ‘t good is): vrunTj, mit ein T dus. Noets gezeen? Kan. Veer sjrieve vrund(j), wiel ’t Nederlandjs vriend haet. Tuurlik: ’t miervoud is vrienDen. Mae dao höbbe veer nieks aan: in vrunj of vrun zeuk me vergaefs nao ein D of T. Veer kalle waal van vrunTjelik, dus woveur neet vrunTj? Ich bön benuujd. Volgende kier de paolingsjtein.
Wim Kuipers, 16 augustus 2010