't Lètste nuuts

Jaorprogramma Veldeke Krink Ech:

Laezinge, väördrach en väöl Limburgse meziek


Väör ’t kómmendje verenigingsjaor haet de Veldeke Krink Ech ’n oetgebrèdj programma klaor. Dao-in zeen laezinge, activiteite zoa es väördracht, o.a. väör kènjer mer ouch väör aojere, en Limburgse meziek good present. De ieëste activiteit in januari  is – wie de leste jaore gebroekelik – ’t bezeuk aan de bóntje aovendj van "De Aester” op woonsdig de 18e, waat de krink plaatsj ónger de titel “Dialect in al zien sjoanheid”. Hiebie weurtj aandach gesjónke en es det kan 'n bezeuk gebrach aan dialect-activiteite van anger vereniginge.  Op 7 mieërt gevolgdj door de “aangeklèdje” jaorvergadering mit ónger angere 'n geprissenteerdj foto-äöverzich vanne activiteite van ’t aafgeloupe jaor en mit meziek van Jan Ridderbeekx.

 

Daonao starte, in mieërt en april (mer intern is m’n den op sjoale en thoes al langer bezig), de declamatiewedstrieje väör de basissjoaljeugd: op vriedig 30 mieërt de finale väör de regio Ech in de Pejjerzaal en op vriedig 13 april de finale väör groat Zöstere in de Hermeniezaal. Mer létj op: datum en plaats zoewe nog kènne verangere! De Limburgse Finale is in elk geval op zaoterdig 19 mei in de Oranjerie in Remunj en haopelik zeen oos deilnummers dao weer bie.

 

In april verder ‘ne aovendj mit de Mestreechse sjriefster Maria Scheres, aangevöldj mit meziek door Hans Emmen. In 't zorgcentrum Vastrada weurtj ‘ne väördrachte-middig gebaoje op 25 april, in de Egthe op 9 mei wie gebroekelik ‘ne väördrachte-aovendj. Middig en aovendj zeen neet allein väör de bewoners. Ouch anger belangstèllendje zeen welkom, mer door dees activiteit in de zorgcentra te haoje kónne de bewoners d’r in elk geval mekkelik bie zeen.

 

 

Mit ’t jaorliks oetstepke op 10 juni brènge weer ’n bezeuk aan de “Groate Brónk” in Grónsveldj.  Dao-äöver zal op 30 mei 'n laezing gegaeve waere door Jan Hayen, zoadet w’r óntstaon en beteikenis van dees aoj traditie weite es w’r gaon kieke. Bie 't oetstepke zitj verder nog 'n boattoch äöver de Maas.

 

Dit jaor zeen weer 'n paar gezamelike activiteite geplandj mit de Heemkundevereniging “Echter Landj” en de Natuurhistorische Vereniging “Pepijnsland”:  'n natuurwanjeling op zaoterdig 23 juni bie de Hómpesche Meule, 'n laezing van Frans Pollux ónger d’n titel “Oos verleje es waope” op 17 oktoaber,  en 'n laezing äöver archeologische vóndste in Ech en ómgaeving.

 

Nao de vekansieperiode volgtj op 19 september 'n aovendj mit stökskes-sjrievers oet de gezet: Jan Sjure en Guus Urlings. Paul Weelen zörgtj den väör de meziek. En op 17 november nog ‘ne aovendj róndjóm Limburgse troubadours. Det is informatie, meziek door René Haustermans en es m’n wiltj ouch mit zènge! Weer sloete ’t jaor op 21 december aaf mit de kersviering.

 

 

 

Noe lid waere!
Aan de meiste activiteite kan ouch deilgenómme waere es m’n neet lid is van Veldeke Krink Ech. Den betaaltj m’n vief euro entree. Mer woróm neet noe geliek lid waere? G’r kèntj den ’t hieël jaor aan alle activiteite deilnumme. Leje óntvange ouch 't kwartaalblaad “Veldeke bekèt” wo-in de activiteite waere aangekondigdj en achteraaf ouch verslage.

 

Mer ouch belangriek: waem lid is van Veldeke óngerstreeptj en steuntj ’t belang vanne Limburgse taal es óngerdeil van oos cultureel erfgood. Of hove w’r dao väör uch gein aandach aan te sjènke?