Platbook 3 euver 'sjerneermomente'

Nao Platbook 1 (columns samegesjtèld doer Wim Kuipers) en Platbook 2 (ieëstelinge doer Har Sniekers) zal in Oktober Platbook 3 oetkómme. Sjuus ómdat de sjrievers van de sjrieverskringe oetkieke nao e podium woeë ze in kinne sjrieve (boete o.a. op dees site op 't internet), zal Colla Bemelmans oet Nut 't Platbook 3 samesjtèlle allein mer mit werke van luuj van de sjrieverskringe, te weite: sjrieverskrink Venlo, Wiert, Ech, Gelaen en de algemeine krink dae mit luuj oet gans Limburg in Zitterd biejein kumpt.

Colla Bemelmans: t Tema zal zin: "Sjerneermomente", die momente woeë 't in 't laeve ech óm drieët, sjerneert, wie 'n duur óm 'ne täölder, aope, toe en weer aope. Dat zint momente wie gebaore waere, duip, trouwe, sjeie, sjterve, in de VUT gaon, jibilea enzoeëwier.

Ómdat d'r mer 58 pagina's besjikbaar zint en 60 (!) luuj van de sjrieverskringe dees oetnuëdiging kriege höb v'r de sjerneermomente beperkt tot GEBAORE WAERE (ouch bv duip) en SJTERVE (ouch bv rouwverwirking). Hieoet bliek ouch dat d'r mer ein of twieë werke van jieëkere sjriever in kinne. Misjien dat 'ne angere kier e oetgebreider book kint versjiene woeë mieë werke van uch in kinne en ouch anger sjerneermomente. Es g'r mieë werke insjikt en d'r gein plaatsj vuur is zal ich selectere, vuur de res cómponeer ich allein mer.

D'r vraoge mich dèk luuj : höbs te nieks vuur 'n aovendwake of vuur de gebaorte van mien kleinkindj enz. D'r is vraog nao. Vreuger gónge v'r nao de juffrouw van de sjoeël, die houw e book mit Gelegenheidsversjes: op déze héugelíjke dág... Zoeë hooft 't neet, es 't mer good is.

Ich nuëdig uch dus oet vuur get in 't plat te sjrieve uëver gebaorte en doeëd gaon, gedichte, verhaole, haiku's enzoeëwier, van pak weg ein, maximaal twieë a-veerkes. 't Mótte werke zin die nog neet in e officieel book zint opgenómme. Waal maoge natuurlik dinger die in de gezèt, 't plaatsjelik blaad, e beuksjke van de sjrieverskrink versjieëne of wat g'r opsjikde nao de Veldeke literatuurpries. Sjrief zoeë väöl meugelik in de officieel Veldekesjpelling.

1 September sjluut de insjikmeugelikheid. Wach neet pès eind Augustus, meh sjik 't alvas.

Mien adres is neet wie 't al drie jaor verkierd sjteit in 't Veldeke vademecum, meh bertie.bemelmans@home.nl

Ich vrui mich op de sjoeën werke die g'r gaot insjikke.

Colla Bemelmans

Dorpsstraat 55

6361 EK Nuth

tel: 045 524 2075

mailadres bertie.bemelmans@home.nl